一入到去見到環境都幾好，同時以依到既擺設以及小弟將近福爾摩斯一成功力既觀察力，可以得知依到係玩外賣，Okay小弟家住紅磡唔淆你！跟手問下靚女老細依到買野食係咩玩法，點知佢一指上面餐牌，嗚呀，我完全嚇親！
嘩咁多Choices點簡阿！咩玩法阿依到！乜熱狗腸都有分咁多隻架咩！作為牛屎仔既我連直布羅陀係邊都未知阿！好彩阿老闆娘都好細心咁介紹左一陣，攪到身為小毒男既我受寵若驚，紅都面曬，最後就買左三個，分別係A1牛仔腸配醬中之王Honey Mustard，A3紐倫堡腸配黑松露醬，同埋A10黑森林腸配辣汁，唉證明毒男真係永遠最易落搭，不過價錢都算幾平民，只係20幾蚊左右，係熱狗界黎講算唔貴，加埋套餐就加12蚊有埋小食(薯條/薯笑餅/粟米杯/德國酸菜)同野飲，不過近排小弟興減肥所以無加到。後尾老闆娘問我有冇興趣試下佢地既招牌熱熔芝士，話好過癮，雖然小弟最近玩減肥，但諗諗下，唔食飽邊有力減肥呢！Okay，我要加兩份！！！
Yeah等左五至六分鐘到就攪掂啦，即叫即做黎講算係快啦。等緊既途中見到有個Brunch set好似幾吸引，下次可以一戰。收到貨之後就馬上狗衝番屋企開餐啦汪汪。
很想要吧！嘩點知一打開就真係呆左，我只係見到芝士芝士同芝士！未諗過原來咁大堆芝士仲要係咁正！好有料阿依個熱熔芝士！
牛仔腸配Honey Mustard加芝士
黑森林腸配辣汁加芝士
Honey Mustard有幾好食我諗我都唔洗再多講，至於芝士有幾正我都唔直接答你，用圖答你。總之就係厚厚一堆好正有滿足感，中意芝士既朋友一定無得錯過。同埋我發現到原來來自唔同地方既腸係真係唔同味道同口感架，依鋪真係鄉下仔出城，因為我成日都以為條條腸都一樣樣。
不過最令我覺得驚喜既都係依個A3紐倫堡腸配黑松露醬，點解話驚喜呢因為阿老闆娘話依隻醬係佢地自家調製，話真係有落黑松露，我心諗，吹咁大？最多咪沙律醬加少少黑松露粉仔。Okay，結果我輸，的確係沙律醬，但係有好大好大陣黑松露味！又真係幾有料。
有料指數 (5個♥為最高)
味道 ♥♥♥♥
環境 ♥♥♥
衛生 ♥♥♥♥
服務 ♥♥♥♥
抵食 ♥♥♥♥
地址: 紅磡必嘉街97號黃埔唐樓C座106A舖
前往方法:
1. 從尖沙咀漢口道搭乘6號小巴，在紅磡火車站後一站下車，過馬路往直走便能抵達。
2. 從紅磡港鐵站B出口，沿隧道行走至往紅磡區行人天橋，直走到橋尾，下樓梯後轉右走直至 看到百勝酒家，再往前走即可抵達。
沒有留言:
張貼留言
Leave us a comment!