SPD4459 [紅磡] 識係紅磡食平價日本野 一定係食風！神！

話說小弟由好細個開始已經好中意食日本野，但細個邊有咁多錢買貴價日本野食丫，所以只有睇住d壽司阿刺身阿望而生嘆。但到左中學時期，一切就突然起左變化，就係因為佢，風神！

風神，全名都係風神，號稱紅磡區壽司既清泉，Poly學生既救星(因為Poly學生有長期折扣)，以及小弟既御用飯堂。佢依到玩法就係外賣既，當然你都可以堂食，但唔正路囉。

小弟最欣賞既就係佢既環境，感覺好乾淨，你知啦食日本野最驚就係唔衛生，而佢採取開放式廚房同埋純色裝修既做法就正正係想話比你聽：come on we are freaking clean! 

好啦重點終於黎番最重要既野食啦！先講價錢啦，叫得做飯堂既當然唔貴得去邊啦！最平其實三蚊已經有交易，仲要有好多選擇，例如三文魚(is基本)，墨魚，種種軍艦等。Poly學生係到買野仲有九折，換言之你可以以2.7蚊既價錢就買到一舊壽司啦，係咪抵先！而小弟就最中意買既就係依隻28蚊10件既三文魚set(因為我係用壽司當飯食的所以一定要食多D)，用埋Poly卡只係25蚊，邊到搵阿！講番壽司本身既味道，其實以依個價錢都相當之唔錯，算係魚有魚味咁囉。值得一提既係買依種盒裝三文魚壽司最緊要識簡，有時執到D腩邊位黎食(最易分既方法就係佢會帶住D好似魚鱗咁既銀邊，但其實唔係魚鱗黎)，咁就爽啦因為真係好好食，絕對係蔗渣價錢，燒鵝味道！

(依盒好明顯唔係腩邊，不過都ok，通常白色部份愈多愈好食）

今日小弟買左以下咁多樣野，仲有值得推介既就係個個燒魚皮(樓下黑黑地色個舊)！佢係將原本生既三文魚皮連肉燒到半生熟，口感同味道都一流，worth to try ！

邊間鋪都有佢既招牌菜，而我覺得風神既招牌菜一定係佢－厚切三文魚腩壽司！佢依D好明顯就係走重劍無鋒，大巧不工既路線，一個字，厚！令你難以抗拒想食佢既衝動，因為實在太吸引啦！

風神

有料指數 (5個♥為最高)

味道 ♥♥♥♥

環境 ♥♥♥♥

衛生 ♥♥♥♥♥

服務 ♥♥

抵食 ♥♥♥♥

地址: 紅磡必嘉街83號地下

前往方法:

1. 從尖沙咀漢口道搭乘6號小巴，在紅磡火車站後一站下車，過馬路往直走便能抵達。

2. 從紅磡港鐵站B出口，沿隧道行走至往紅磡區行人天橋，直走到橋尾，下樓梯後轉右走直至　看到百勝酒家，再往前走即可抵達。