SPD4459 [九龍城] 獨特風味的清真菜 清真牛肉館 (Kowloon City) The unique relish of Xinjuang Chinese Restaurant - Islam Food

一講起九龍城10個朋友有9個都一定係即刻諗起食泰國菜。嗱，識飲識食既你就一定唔係咁膚淺既。依家我係度推介既呢間餐廳主要係食回教菜。除左清真菜之外佢仲揉合左多國菜式，例如有上海菜同巴基斯坦口味既咖喱。真係一啲都唔寡，大人細路都岩架。

一黎到門口就已經堆滿哂人，不過都唔洗點等位，但如果係星期五、六黎既話就可能要等耐少少喇！

入到餐廳睇住個餐牌真係花多眼亂，如果你好似我咁有選擇困難症既話不妨睇睇以下呢幾版既清真推介啦。

          

黎得食回教菜就一定唔好諗住會有豬肉食喇，識食一定係食牛或羊。都係唔講咁多經喇，真係餓到個肚都扁埋。事不疑遲，去相啦！

一開波當然要試左招牌菜先喇！呢間餐廳既鎮店之寶非牛肉餅莫屬。

說時遲那時快，期待已久既牛肉餅終於黎喇！！嘩！真係口水都差啲滴到地下都濕埋⋯⋯

唔好以為個牛肉餅唔熱，好傻仔既我一黎就大大啖咬左落去，結果當然係奶野碌親個咀仔喇。唔想影響食慾就記得唔好心急，慢慢品嘗呀！

一咬開就知呢個餅無得輸，皮薄饀靚又多汁！食完一個完全無油淰淰既感覺，簡直可以鯨吞多個。

溫馨提示：唔想啲汁浪費滴曬出黎就記得要用匙羮承住，然後慢慢輕輕咁咬開，咁就唔會咇曬出黎咁狼狽架喇

另外呢個巴基斯坦咖喱加埋無羶味既羊腩，味道都不俗。咖哩味好濃郁又唔太辣，送飯真係一流！

蔥油餅一啲都唔油膩，好香蔥油味，而且煎到外脆內軟！如果加埋啲咖哩汁一齊食仲惹味！

食左咁多濃味野係時候叫返啲清清地既餸中和返。呢碟奶油津白味道都幾特別有少少奶味，但味道就真係淡左啲。

睇左呢幾樣推介，係咪即刻心思思想去整返件牛肉餅食下呢！提提你，呢間餐廳有下午茶時段架，仲抵食！大家快啲約埋三五知己去試多啲唔同既菜式啦！

清真牛肉館

有料指數(5個♥為最高)

味道 ♥♥♥♥
環境 ♥♥♥

衛生 ♥♥♥

服務 ♥♥

抵食 ♥♥♥

營業時間: 星期一至日上午十一時至下午十時四十五分
They open 7 days a week from 11:00am to 22:45pm.

地址 Address：

- 九龍城龍崗道 1 號
1 Lung Kong Road, Kowloon City

- 九龍城打鼓嶺道33-35號地下
33-35 Tak Ku Ling Road, Kowloon City

電話 Tel：2382 1882／2382 2822