SPD4459 ［九龍城］秉承傳統的潮洲合成糖水 Traditional dessert Chiu Chow Hop Shing Dessert

夜晚黎到九龍城同友人食飽飽之後當然唔少得去埋下半場啦！食埋糖水先走係基本既指定動作！

九龍城既甜品舖可謂包羅萬有，西式、泰式、韓式通通應有盡有，但係⋯⋯食得多特別野始終都會開始厭倦。繼上一回既地茂，激起左我去尋覓更有質素既中式糖水。於是我地今次繼續回歸簡撲，又為大家搜羅左一間比較傳統又踏實既中式糖水舖 －合成糖水！！

黎到門前，已經不禁地俾佢懷舊既裝修設計吸引住，呢種設計完全充分表現到舊式香港既味道。

由於我地黎到都只係晚上9點半左右，所以一去到人唔算多，但到我地食完之後人潮就開始湧現。 店舖裏面一張張圓枱加上懷舊味道十足既枱布令人更加懷念舊時既香港。

除左車仔麵檔之外其實真係好少可見到食肆會幾乎將成個廚房搬左出舖面咁濟，更莫講話係甜品舖，不過咁樣就可以同客人有更近距離既接觸，對客人黎講都別有一番體驗。

一坐低就即刻睇左有咩食先。嘩！選擇多到眼都花埋，望住個牌真係會睇到你燥底！而有嚴重選擇困難症既我當然要諗返10分鐘先決定到食咩啦。其間老闆見到我地咁苦惱，都好主動咁介紹左幾款岩我地食既糖水。

最後我同友人都係揀左D最簡單既傳統糖水。登登登登！！

今次我地揀左芝蔴糊、腐竹薏米同埋腐竹雪耳糖水！揀完糖水之後，老闆提議我地加埋清心丸。

上圖透明正方型粒野就係傳說中既清心丸喇。我非常推介大家加入清心丸，清心丸口感煙煙韌韌，感覺似黑珍珠，非常有咬口，可以令到成碗平平無奇既糖水增添左豐富既口感。 不過唔知係咪人越大越唔好嗜甜，我覺得D糖水稍為偏甜，但大致上整體味道都唔錯，可以消暑之餘又滋潤，尤其係有薏米或者雪耳既糖水。

另外呢個芝蔴糊唔會好稀，芝蔴味都頗濃而且好滑。喜歡傳統口味既你可以選擇食呢個芝蔴糊。

溫馨小提示：老闆話食芝蔴糊可以滑腸，可以舒緩便秘既問題架！

由於晚餐食得太飽，本來想叫多幾款糖水同大家分享，但真係食唔落，為有介紹住少少俾大家先啦。以下落黎我地將會繼續努力為你介紹更多更美味更有特色風味既美食！

題外話，其實依家不論係糖水舖或者甜品舖都過分著重於追求創新，繼而忽略左傳統同質量，但係呢間糖水舖咁多年黎仍然可以憑住傳統口味既甜品而迄立不倒，真係唔簡單，大家快D去支持下啦 。

潮洲合成糖水

有料指數(5個♥為最高)

味道 ♥♥♥
環境 ♥♥♥♥
衛生 ♥♥♥♥
服務 ♥♥♥
抵食 ♥♥♥

地址 Address：九龍城龍崗道9號地下G/F, 9 Lung Kong Road, Kowloon City

電話 Tel: 2383 3026
營業時間 Business hour：星期一至日 12:30 p.m - 01:00 a.m